حميد ابو عيسى

آيَتْ وآنا

آيَتْ

لـَـيبي دْرَخْشَنْ تـْوِنـّا پـَغْري

وْشْپلّا بُرْكي وغْوِشْلي عَيني

وْلـَـپـِّـشْ كـيـذَنْ ما ثِلـّـيبي

صيرْ ليشاني وْعْمِچلِ لـِبّي

شِنـْثا دْلـَـيلِ لـَـكْ خَلـْـيالي

وْشِمْشا دْيوما كـْبَخيا لحالي

وْلِـبـّي عْـميچا كـيمِرْ طالي

بَـسـّا بـِخْـيـا خْــويـلِ قـالي

لأيكا زالي وماني پيشِنْ دْحاينْ إلـّي؟!

أخـِنواثي ويمـّي سـوتا رْحِقـْلـَي مِنّي

وناشِ دْدَرْتا بْـلِبـّا وْكِمـّا كِمْ ناشَيلي

ماني إتّي پـْياشا بْدُني شوقْ مِنْ لِبّي؟!

أيث ْ خَلِبّا كحاينْ إلـّي وولْ بِسْپارا تـَدْ قاپـِلـّي

إيثِنْ گودا رابا وراما دْيَتْوَنْ بطِلـِّحْ وْپـَثْخَن ْ بِلـّي

گودا عْميرا بْكيبـِحْ وكيبي وبْپايشْ شورا طالِحْ وْطالي

لـَپـِّشْ ليبي لـْزِمَّرْياثا بقالا خويا، بَسّا چْهيلي، بَسّا چـْهيلي

آنا

كْقارِنْ گيبَخْ بْمِشْتاقوثا وقالي خْويلِ

شِتـْقا وْحِشّا وْمْدِمْءِ دْعَيني لِبّي كْويلِ

لـَپـِّشْ ليبي دْرَحْقِنْ مِنـَّخْ- حُبّي لـْهيلِ

وْليلْ بـِدْآخا لا بگو يوما ولا بگو ليلِ!

لـَتّي پيشا شوقْ مِنْ إيشوعْ دْآوِذْ حَيلِ

وْبْهَيمانوثي بْماطِنْ إلـَّخْ وبْدَمْرَتْ ثيلِ

مْسـَبـَبْ لـَيثِنْ چو بَـرْناشا تـَـدْ مَكْليلِ

حـُـبّا رابا إنْ مَچـْهَـيلِ كْإيـوِذْ حـَـيلِ

وْلِبـّا دْعاشِقْ بِشْ كِمْچالِبْ إنْ مَبْخيلِ

آيَتْ

ووَنْ ثيلي پـْثوخْلي باعوخْ تـَدْ قـَپـْلِتّي

وْدْريلِ ريشي لروشوخْ دْيَمِّ دْمَنيخِتّي

لـَپـِّشْ ليبي دْرَحْقـَنْ مِنّوخْ كِمْ قـَطـْلِتّي

بْعَيني وْلِبّي كْقـَـرْيَنْ گيبوخْ تـَـدْ شَمِتّي

آنا

هَـيّـو صَوبي مَلـْحَمْ دْلـِبّي تـَـدْ قـَـپـْلِـنّـَّـخْ

كلْ صُباثي بْمَلـْهِنْ شَمْعِ دْبَهْرا صورْتَخْ

أورِ إللِبّي دْشَخْنا دوكـَخْ وْدْنـَشْيَتْ حِشَّخْ

لـَـتـّي آنا بـْآذي دُني شـوقْ مـِنْ حـُبـَّـخْ!

آيَتْ

يا عَـزيـزي وبـِهْـرا دعـَـيني بَـسّا ناهِتْ

كْگيدا گياني كودْ كْشَمَنّوخْ إيوِتْ گباخِتْ

مو لـَـكيذِ تْ كعايقْ لِبـّي كودْ كچاهِتْ ؟!

آنا كِبَنْ دْخَهْيَنْ بْگاوخْ وبگاوي دْخاهِتْ

أوگستا في 03/04/2005